Իրադարձութիւններ

Մեր խորունկ արմատներէն՝ դէպի նոր բարձունքներ

Սուրբ Յակոբ Ազգային վարժարանի 50ամեակը նշելու համար, ՍՅԱՎ-ի Հիմնադրամը կը ձեռնարկէ բարեսիրական դրամահաւաքի աննախընթաց արշաւ մը։ Այս պատմական նախաձեռնութեան նպատակն է հաւաքել 2.5 միլիոն տոլար իրականացնելու Սուրբ Յակոբ Ազգային վարժարանի տեսլականը եւ զօրակցելու անոր առաքելութեան։

Որոշուած առաջնահերթ երկու ծրագիրները դպրոցին առիթ պիտի ընձեռեն արդիականացնելու իր ենթակառոյցները, մշակելու դաստիարակչական գրաւիչ ծրագիրներ եւ ընդունելու աւելի շատ աշակերտներ։

Առաջին ծրագիր .- Դպրոցի բակի վերանորոգութիւն
Այս ծրագիրը կը նախատեսէ դպրոցի արտաքին տարածքներու ամբողջական վերափոխում՝ մեր բոլոր աշակերտներուն համար հաճելի եւ ապահով միջավայր երաշխաւորելու համար: Խաղավայրի տեղափոխումն ու մանկավարժական պարտէզի տեղադրումը տարածքը պիտի դարձնեն մատչելի եւ արդիական մեր դպրոցի ամբողջ համայնքին համար։

Երկրորդ ծրագիր .- Նիւթական աջակցութեան դրամագլխային հիմնադրամի ստեղծում
Դրամագլխային հիմնադրամ մը ստեղծելով, մենք երկար ժամանակի վրայ կը կարենանք երաշխաւորել տարբեր կարիքներ գոհացնող վերահսկուած նիւթական աջակցութիւն տրամադրելու մեր կարողութիւնը, ամրապնդելով մեր համայնքի դիմացկնութիւնը։

Նուիրատուութիւն մը կատարել

Սուրբ Յակոբ ազգային վարժարանի հիմնադրամը կազմակերպած է տարեկան դրամահաւաքի- երեկոյ մը, հինգշաբթի 11 մայիս 2023-ին։ Այս երեկոն կը փոխարինէ տարեկան դրամահաւաքի աւանդական ընթրիքը, որ նախորդ տարիներուն կը կազմակերպուէր վարչական խորհուրդին կողմէ։

Երեկոյի ընթացքին տեղի պիտի ունենայ բարեսիրական ցուցահանդէս մը։ Հրամմեցէ՛ք ծանօթանալու երկրորդականի մեր տաղանդաւոր արուեստագէտներու ստեղծագործութիւններուն, որ իրագործուած են իրենց գեղարուեստի դասապահերու ընթացքին։ 

Այս երեկոյի գլխաւոր հասոյթը պիտի յատկացուի արուեստի աշխատանոցի վերանորոգման։ Մտադիր ենք նաեւ, այս հասոյթէն բաժին յատկացնել դասարաններու թուային համակարգման գործընթացի հետապնդման ինչպէս նաեւ կրթանպաստներու ծրագրին։ 

2019ին Սուրբ Յակոբ ազգային վարժարանը նշեց իր հիմնադրութեան 45ամեակը, կազմակերպելով դրամահաւաքի աննախընթաց մեծ արշաւ խորագրուած՝ «Ներդրում կատարել ի նպաստ մեր ապագայ ղեկավարներուն»։

9 մայիս 2019ին մեկնարկած այս արշաւը շարունակուեցաւ մինչեւ թելեթոնի կազմակերպման օր՝ 3 նոյեմբեր 2019։

Աւելի քանի 575 նուիրատուներ մասնակցեցան այս մեծ դրամահաւաքին, որուն հասոյթը եղաւ աւելի քան 804 600 $ ի նպաստ չորս հիմնական ծրագիրներու՝ գլխաւոր ճաշարանի նորոգութիւն, արհեստագիտական եւ լսատեսողական խմբագրման կարելիութիւններով օժտուած սրահի մը սարքաւորում, լուսանկարչական տաղաւարի մը, ինչպէս նաեւ բոլոր անհրաժեշտ ենթակառոյցներու ապահովում, դպրոցի բակի բարեկարգում, ծաղիկէն  6–րդ կարգերու 15 դասարաններու վերանորոգութիւն եւ արդի կահոյքով կահաւորում ապահովելու աշակերտներուն աւելի աշխոյժ մասնակցութիւնը իրենց ուսումնառութեան ընթացքին։ 

Այս աշխատանքը իրականացուց յանձնախումբ մը կազմուած հետեւեալ անդամներէն՝ Լորի Ապրաքեան, Նայիրի Բաբախեան, Նորա Գաբրիէլեան, Թամար Եաղճեան, Սիլվի Կիւլպէնքեան, Նաթալի Հաճէթեան, Արեգ Մարգարեան, Քրիսթին Մարգարեան, Թամար Շահինեան եւ Սարին Սապունճեան  ։

Հիմնադրամը ջերմօրէն շնորհակալութիւն կը յայտնէ գործընկերներուն, նուիրատուներուն, ինչպէս նաեւ կամաւորներուն, որոնք գործի լծուեցան այս մեծ դրամահաւաքը իրականացնելու համար։